領匯轄下再有街市長期丟空！筲箕灣耀東邨居民黎先生指出，耀東街市十室九空情況已存在多時，不滿領匯未有設法改善，「嗰度原本有五、六十檔，以前好多嘢買，依家淨係得五、六檔賣芽菜豆腐，其他檔就攞嚟養老鼠，真係好嘥！」黎指上址因欠缺管理，近日招致鼠患，衞生情況惡劣。
東區區議員趙資強批評領匯只顧加租，罔顧居民需要，令資源白白被浪費，「領匯冇積極引入新商戶，只識一味加租，搞到啲檔愈開愈少，喺度嘅檔戶遲早畀佢陰乾！」趙希望領匯能正視上址問題，以免資源繼續被浪費。
領匯發言人表示，已密切注意上址租賃事宜，希望為街市引入不同元素與組合，為居民提供更多合適服務。發言人又稱，接獲投訴後，即時與清潔承辦商作實地視察，並加強清理及作出針對改善清潔之相應配套。