失業率、物價指數，或者係蚊患指數創新低就話拍手掌啫，政府民望創新低，點維持有效施政？香港前景又點會唔着紅燈吖？

尋日有團體發表第三季「特區政府管治信心指數調查報告」，讀者睇怕感受只有三個字：冇眼睇！根據評分標準，一分代表完全冇信心，四分代表普通，七分代表非常有信心。港府喺民生政策、經濟及規管、政府運作、人權自由同政制五大管治範疇，評分較上一季全部插水，其中民生政策跌得最勁，跌咗近百分之五，得番三分多啲。

喺十九個管治單項入面，評分下跌嘅居然有十六項，當中「房屋政策」跌咗一成一有多，係調查啟動以來呢個項目最低評分。包括「改善貧富懸殊」、「改善教育政策」、「避免官商勾結」、「問責制」等七個項目，同樣錄得新低。呢張咁嘅施政成績單，你話係咪睇見都眼冤吖？

話時話，如果唔係港府罔顧民生疾苦，幫助低下階層講多過做，點會搞到今時今日咁天怒人怨，管治信心跌到阿媽都唔認得吖。

呢嗱，金融海嘯令本港經濟雞毛鴨血，失業率飆升，打工仔冇啖好食。港府「穩金融、撐企業、保就業」成效乏善可陳，近排經濟稍為回穩，施政報告就即刻冇糖派，淨係攞「發展六大產業」嚟畫餅充飢，市民信心唔插水至奇啦。

港府改善民生交晒白卷，政策混亂同樣令市民大失所望。呢次調查入面，房屋政策評分跌幅最大，係因為當局喺呢方面表現完全失晒分。

早排豪宅屢創「天價」，整體樓市水漲船高，有數據顯示，港人供樓支出可能已經超過收入五成，市民都擔心要做「無殼蝸牛」，希望政府做啲嘢。但當局拒絕承認樓價已到咗普通市民難以負擔嘅地步，又攞唔出清晰有效嘅措施。

至弊嘅係，掌握決策大權嘅行政會議成員竟先後企出嚟，就會唔會復建居屋及恢復定期賣地同港府唱反調。樓價對本港社會同經濟影響深遠，牽一髮而動全身，港府內部各有各講，七國咁亂，令人無所適從，房屋政策評分包尾，都算「實至名歸」咯。

值得關注嘅係，市民對港府接納基層同中產意見程度嘅評分，分別跌咗一成同半成，同樣係調查啟動以來相關項目嘅最低評分。好明顯，煲呔曾同佢個政府仲係我行我素，視民望如浮雲。調查仲發現，認為民生事務好重要嘅受訪市民明顯上升，接近四成，如果當局再唔重視民意，管治信心只會繼續尋底。

計功夫茶話齋，政府同市民離心離德，施政根本無可能得到市民認同。依家個跛腳鴨政府冇晒威信，「群策創新天」變咗民望創新低，認真夠諷刺！