「造紙大王」李運強贏馬不忘行善，上月愛駒「包裝大師」爆大冷捧走百三萬獎金，李主席講明會捐獎金做善事，尋日果然坐言起行，以二公子、理文造紙董事總經理李文斌名義，捐出九十幾萬畀嶺南大學成立「李文斌助學金」。
李公子尋日親自將支票交畀嶺大校長陳玉樹，早前陳校長呻過金融海嘯下揼人心口捐錢甚艱難，話口未完就有善長出手，呢筆善款可算係及時雨。
文斌年紀輕輕就慷慨行善，為年輕人樹立好榜樣。佢話深明教育對社會發展嘅重要性，希望呢筆助學金能協助有需要嘅學生，將來學成歸來回饋社會，認真係有心人。
嶺大多咗筆獎學金，最開心應該係陳校長，皆因嶺大名氣唔及其他大學響噹噹，今次獲商人力撐，擺明為嶺大嘅博雅教育理念打番支強心針，難怪陳校長收完支票後連聲道謝，笑到見牙唔見眼。