聽日就係賭王何鴻燊嘅八十八歲生日，雖然佢依家仲喺養和醫院留醫，不過二太藍瓊纓、三太陳婉珍同四太梁安琪都會喺唔同時段為賭王慶祝，各自以不同方式為賭王賀壽。
二太同囝囝猷龍、囡囡超儀尋日都有去醫院探望賭王。講起賭王嘅生日，二太話，為慶祝呢個充滿喜悅嘅日子，佢同仔女們今日會捐出一筆可觀嘅善款畀慈善機構。超儀仲話，聽日佢哋會用簡單嘅方式嚟慶祝，總之就要賭王開心啦，佢哋幾姐弟都會各自買禮物送畀賭王以表心意添！
即將牛一嘅賭王心情勁靚之餘仲胃口唔錯，事關三太陳婉珍尋日笑容滿面去醫院探賭王時話，生日臨近賭王好開心，仲話好多嘢都想食。至於四太梁安琪嘅囡囡何超盈就爆料，佢哋一家將會喺醫院食飯兼切生日蛋糕，但時間仲要等四太安排，超盈仲十分有心，同妹妹親手整咗份禮物畀賭王，希望佢早日康復、一家人開開心心！