不過，有人歡喜有人愁，呂明華年前同廠商會副會長林大輝拗手瓜爭奪立法會議席不果後，一直抱住屢敗屢戰嘅心態落力爭取做廠商會會長。雖然佢選舉前講過會以平常心對待是次選舉，仲明言輸贏屬平常事，之不過選舉結果一出，呂明華亦難掩失望之情，離開時刻意混入人群之中，看到我哋拍照，即時舉起手上嘅公文袋遮面，及後更輕聲叫記者唔好影佢相。不過佢都大方表示接受選舉結果，仲話日後會繼續為社會服務添。

講番新任會長David，唔少投票嘅會董都對佢讚不絕口，當中以佢嘅老友林大輝最開心，林大輝盛讚David表面斯文、實際上「好打得」，係會長合適人選。林大輝仲揚言會辭去廠商會副會長一職，專注立法會事務，而David則理好會務，實行同David雙劍合璧喎！