前高官馬時亨加入上市公司中策集團任主席兼非執行董事，被人質疑佢當日借患病「跳船」為重返商界鋪路，肥亨當然極力否認啦，話當日真係擔心長期受壓會爆血管，先至辭官歸故里。其實肥亨又豈止患上腦部動靜脈畸形症吖，卓妮打聽到佢仲患有長期頸肩痛，當年出席立法會會議時一直忍痛死頂，初時醫極都唔好，直至遇上一名「隱世」名醫才能斷尾。
肥亨於○二年出任問責官員後，工作壓力不斷增加，直至○四年第四季開始出現頸肩痛，情況仲愈來愈嚴重，據聞當時出席立法會會議都係忍痛死頂，對住議員笑笑口都幾考功夫。直到○五初前自由黨主席田北俊娶新抱，肥亨忍痛出席婚禮，同場立法會議員梁劉柔芬（Sophie）嘅老公梁孔德見狀，主動介紹咗位註冊中醫師張勇畀肥亨。
密集式針灸推拿
肥亨為求脫苦海，每星期幫襯一至兩次，進行密集式針灸同推拿，如是者醫足半年，情況大有好轉，頸肩鬆咗好多，即使後來無乜事，都會Keep住兩至三星期去幫襯一次。卓妮去過張勇位於廟街間地舖診所，張醫師憶述，當年肥亨因為工作壓力大，手部出現麻痹，仲有啲神經緊張，但經過長時間針灸和推拿後，情況大有改善。
張醫師話，現時肥亨每一至兩個月都有嚟睇吓，當係調理身體，但好明顯無做局長後，肌肉無咁緊，鬆咗好多，唔使再按得咁用力。卓妮舉頭一望，發現牆上有塊鏡匾原來係肥亨送贈，寫着「醫術高明」四個大字來讚揚張醫師，署名就只有「馬時亨敬贈」五個字。後來卓妮打過電話去問肥亨，佢話張醫師講嘅嘢千真萬確，仲讚佢手勢好掂，但礙於當年做緊官嘅關係，所以只係以個人名義送咗塊鏡匾畀佢，以示謝意。
梁孔德介紹幫襯
卓妮早幾日遇到Sophie與擔任香港足球總會主席嘅丈夫梁孔德，才知Sophie多年前有次接受訪問期間，偶一不慎慘坐「無影櫈」，即係唔知張櫈被人移開咗，坐低時成個人坐咗落地，傷及尾龍骨，經朋友介紹認識張醫師，醫咗三日就藥到病除，之後梁孔德仲叫足總啲球員有事就去幫襯，所以做人嘅嘢，有時都幾講機緣。