泛民五區總辭到底係咪搞得成，最後會有幾多個黨派參與，依家仲係未知之數。不過煲呔曾嘅心戰室已經作咗最壞打算，假設泛民以強陣辭職再參加補選，佢哋應該點樣應付。其中一個一廂情願嘅諗法，就係對五區補選給予「冷對待」，任由泛民候選人喺冇對手情況下自動當選，或者只派出一堆不成氣候嘅人同泛民對撼，目的係令變相公投嘅意義大打折扣。

心態唔同 有力一拚

不過建制派嘅心態就好唔同，第一係咁樣做可能會令市民覺得建制派係怕咗泛民，長他人志氣，滅自己威風；其次係正如反對總辭嘅泛民人士分析，補選嘅投票率一般會低過換屆大選，對建制派有利，如果建制派喺五區補選中贏番兩三席，甚至可以令泛民喪失立法會三分之一議席嘅政改否決權。

根據建制派嘅內部評估，五區之中以九東同新西勝算最高。前者兩派嘅實力一向相當接近，泛民計劃派出嘅公民黨梁家傑，上屆得票仲少過同區嘅民主黨李華明。如果做過九東票后嘅工聯會陳婉嫻真係東山復出嘅話，袋巾梁嘅選情實凍過冰水。

團結一致 鞏固票源

泛民喺新西雖然整體仍然佔優，但今次計劃出選嘅社民連陳偉業，上屆只係掹車邊包尾當選，而且得票只集中喺某幾個細選區，加上社民連近年不斷爆出醜聞，只要建制派能夠團結一致，集中晒民建聯、工聯會、鄉事派同前自由黨副主席周梁淑怡嘅票源，絕對唔難將大舊撼低。

至於香港島、新界東同九龍西，建制派認為除咗港島比較難撼之外，其餘兩區都有一定爆冷機會，就算最後評估未必贏到，改派新人出戰霸吓位練吓兵，結果都係有贏冇輸。睇嚟呢場世紀大戰真係點都避唔到，心戰室與其坐喺處諗縮數發白日夢，不如積極啲研究吓點樣幫建制派部署，夾計撼低泛民。