本文重點
中環人對食要求咁高，唔新鮮嘅海鮮都唔使旨意擺入口。位於金鐘太古廣場三期附近嘅法國餐廳 Olala 嘅海鮮煮得相當好味，但位置唔算就腳。成日捐窿捐罅搵嘢食嘅新金王、以四億幾元收購咗金至尊嘅香港資源主席黃英豪（Kennedy），就係佢嘅忠實粉絲。
黃英豪愛鮮美
Kennedy話，Olala所用嘅海鮮每逢星期三、日都會準時打包空運到香港，確保所有食材都保持高質同新鮮，而佢就最鍾意食佢嘅名菜白汁煮青口。佢同我哋講，Olala嘅煮法係將乾葱、白酒、雞上湯同青口一齊煮，侍應仲會即場喺你面前烹調，再成煲連埋火爐一齊上添。Kennedy話咁樣嘅食法係最原汁原味，因為所有鮮味仍然留喺煲內喎，而每煲就盛惠一百八十蚊。
Kennedy仲分享佢嘅覓食心得，就係專幫襯一啲由相熟朋友開設嘅細餐廳，佢話咁就可以確保人地唔敢畀唔新鮮嘅食物你喎。
卓妮