去年再婚迎娶法國美女嘅丹麥祖謙王子（Prince Joachim），尋日拖埋新王妃卡雅利耶（Princess Marie Cavallier）訪港晒幸福，仲給卓妮撞個正着。做過香港打工皇帝嘅祖謙絕對係「香港通」，帶太太品嘗香港會美食外，卓妮見成班記者要求佢兩人影番張合照，佢更醒目走過對面馬路，以滙豐銀行及立法會為背景擺甫士，順便幫手推銷香港，認真唔話得！
闊別香港近兩年嘅祖謙王子，今次來港唔再一支公咁寂寞，身邊多咗位甜美王妃。兩人尋日中午十二點幾現身香港會開餐，隨行仲有丹麥駐港總領事麥禮國及兩位保鏢，排場唔算大陣仗，貫徹丹麥皇室唔擺架子嘅平民作風。
新王妃抵得冷
卓妮所見，婚後嘅祖謙王子俊朗依然，着起灰色西裝配粉紅色恤衫，成個型模咁款，吸引中環麗人攞出手機離遠偷影佢。王妃就非常抵得冷，穿上飄逸白色中袖衫，喺寒風陣陣嘅中環街道上連冷震都唔打一個，體魄Fit到極。
法國姑娘卡雅利耶雖然榮升王妃，但衣着簡樸，手挽一條價值近四千港元嘅LV白色披肩及杏色鱷魚皮手袋，左手無名指上嘅婚戒款式簡約，沒有大晒巨鑽。王妃面對蜂擁嘅香港傳媒未見嚇親，全程笑容滿面，更不時望住王子甜笑，新婚喜悅盡在不言中。
立法會前留影
兩人共進午餐至下午二點左右離開，返回下榻嘅君悅酒店休息，臨走前，王子王妃仲停低擺甫士畀記者影相，王子眼珠碌一碌，抬頭左望右望幾秒後突然走過對面馬路，搞乜呢？原來揀咗獅子銀行同立法會做背景留倩影，反應相當快。兩人接住跳上新款保時捷Panamera 4S跑車離開。
卓妮喺丹麥駐港總領事館方面八到，王子伉儷將留港五日，行程夠晒緊密，尋日朝早去完數碼港參觀，傍晚出席喺君悅酒店舉行嘅丹麥食品展，今日再為喺尖沙咀揭幕嘅《丹麥設計珠寶展》任剪綵嘉賓，王子為家鄉品牌如斯賣力，難怪丹麥國民對皇室成員愛護有加囉。
卓妮