本文重點
立法會主席曾鈺成喜逢第二春，尋日係佢同太太伍嘉敏（Carman）大婚之日，一對新人喺會展搞咗個雞尾酒會大宴各界朋友，仲請嚟前律政司司長梁愛詩主持婚禮，身為恩師嘅前資深人大吳康民就做證婚人，好多政商界朋友畀面赴會。曾鈺成同Carman相識四十幾年，多年前兩人都喺培僑中學教書，Carman教英文，曾鈺成就教數學，當年兩人無擦出愛火花，之後各自結婚，曾鈺成娶咗前任太太楊新兒，Carman就下嫁粵曲創作人嚴觀發，仲移民埋去加拿大；直至○四年Carman回流，兩人久別重逢擦出火花，修成正果。
前妻移民變太空成
記得九四年曾鈺成參加立法局選舉，被揭發前妻楊新兒反對佢參政，仲移民去咗加拿大，結果畀人改咗個花名叫「太空成」，最後曾鈺成仲喺選舉中落敗。「十年人事幾番新」，轉眼已十幾年，曾鈺成終於喺○七年與前妻離婚，一年後與任職舞蹈教師嘅Carman拍拖，最後決定結婚，揭開人生新一頁。