有一個古仔係咁樣嘅。大好青年駱偉堅○四年二月二十二日駕駛電單車遇上車禍，途經荃錦公路嘅時候，一架寶馬私家車撞到佢重傷。偉堅原本係消防員，當時未到三十歲，人生一片光明，退休消防局長郭榮光讚佢係「廿一世紀新一代消防榜樣」。可惜吖，一場車禍害到佢脊骨嚴重受創，留醫時間長達三年，完全喪失工作能力。

由體能勁爆嘅消防員，淪為四肢癱瘓嘅輪椅客，平時起居飲食全部需要外人照顧，可想而知係幾咁悽慘。照道理講，撞到人飛起嗰個司機，即使唔使坐監，點都要賠一大筆啦。哈，香港法官有時就係咁搞笑，對於呢單嚴重車禍，只係判肇事司機罰款一千二百蚊了事！

喂喂喂，四肢癱瘓呀，前途盡毀呀，遺禍一生呀，輕輕罰款千二蚊公平咩？當然極之唔公平，所以偉堅決定入稟高等法院要求賠償，索償金額一度高達四千萬。經過兩年纏訟，曠日持久嘅官司終於結束嘞，雙方達成庭外和解。雖然按照協議賠償金額保密，不過相信冇可能係一個小數目。

呢個古仔有冇乜嘢警世意義？功夫茶就諗到三重意義。第一：唔好做一個駕駛態度惡劣嘅司機，橫衝直撞炒車，等於毀人一生。第二：唔好做一個不食人間煙火嘅法官，縱容惡劣司機，等於破壞公義。第三：唔好做一個逆來順受嘅弱者，如果凡事啞忍，等於助紂為虐。

呢嗱，駱偉堅名副其實夠晒堅，人殘志不殘，連佢嘅代表律師都忍唔住喺法庭上讚佢係最勇敢嘅原告。至於法官咯喎，係咁講嘅，強者不論其肢體能力，但以其意志為尚，希望偉堅同家人以後一切安好。

計功夫茶話齋，呢個古仔值得所有駕駛者好好反省，尤其係亡命小巴司機，甚至乎奪命九巴司機。好似冇耐前嘅將軍澳九巴大車禍咁吖，好明顯係司機貪快出事，高速掟彎翻側，結果累到兩死幾十傷，間接受害嘅親戚朋友不計其數。喂，人命嚟㗎，就算唔計賠償係天文數字，淨係良心都過意唔去啦！

講番法官大人，功夫茶有時真係唔明，對於危險駕駛點解餐餐都係得過且過嘅呢？撞到癱瘓居然係輕判罰款千二蚊，即使搞出人命，往往只不過求求其其判監一兩年算數，完全不成比例，絕對冇阻嚇性。如果你係埋沒良心嘅瘋狂司機，見到呢種變相鼓勵開快車嘅判決，少不免逢車過車，逢燈衝燈，想話路上零意外咩？唔係話唔得，難過人類登陸冥王星！

一句到尾，毀人一生千二蚊，惡劣司機個個憎。拜託駕駛人士高抬貴手，拜託法官大人重錘出擊！