三十年無喺屋企洗髮

小寶打扮向來一絲不苟，臨攞獎前專登去銅鑼灣間Hair Salon搵髮型師Nichol Yip 幫佢Set頭，咁啱畀卓妮撞到正。小寶自爆三十年來無喺屋企洗頭，習慣帶埋御用洗頭水去髮型屋，每星期幫襯兩次，計落月花至少七千幾蚊，不過畀人吹頭的確靚好多，小寶覺得物有所值。

小寶唔係一味識扮靚，近年佢「升呢」做理大醫療及社會科學院兼任助理教授，仲喺理大設立一個「雪肌蘭國際感染控制中心」，所以教育同研究都關佢事。

另一位得獎嘅威水女人就係首位踏足南北兩極及珠峰嘅女探險家李樂詩，Rebecca李征服險境代價大，據聞因為探險時飲得太多唔乾淨嘅水，幾年前曾患上重病，不過Rebecca康復後再上征途，嚟緊十二月將率領政商界名人考察南極生態。

喺法律界享負盛名嘅前律師會會長蔡克剛（Herbert）都係得獎人之一，尋日獲全家撐場外，馬會大董葉澍堃（Stephen）都現身捧場。原來兩人因馬匹結緣，Herbert自小醉心鑽研賽馬外，仲係馬主，同Stephen分外啱傾。不過Herbert不忘熱心公益，擔任多家非政府組織嘅名譽法律顧問，佢公子及千金正分別喺英國及香港攻讀法律課程，繼承爸爸衣鉢做金牙大狀。

李樂詩（中）活躍好動，兩個細佬（左三及右三）就文靜唔多鍾意探險，尋日與親友齊齊撐大家姐做大學院士。 （徐家浩攝）	孫太鍾小芬專登嚟捧劉陳小寶場，話欣賞佢即使唔做保良局主席，依然出錢又出力。 （嚴少阡攝）	葉澍堃（左）同蔡克剛都係愛馬之人，分外啱傾。

葉傑全千五萬食隻蟹

今次獲得大學院士銜嘅仲有香港通用製造廠創辦人葉傑全，葉生話同理大結緣於○七年一次大閘蟹宴，同坐喺身邊嘅前理大校長潘宗光傾偈，點知愈傾愈投契，此後兩年，葉生揼水三千幾萬銀撐理大。葉生笑言嗰次蟹宴不過食咗兩隻蟹，但就要捐三千幾萬，即係食一隻蟹要千五萬，好「乸脷」喎！

卓妮