通常嚟講，長壽當然係好事，老人家擺大壽都祝福佢哋長命百歲啦。之不過咁，長壽有時又未必係好事，最驚就係臨老過唔到世，難以安享晚年。喂，假設你六十歲退休，萬一冇錢養老，咁咪要捱飢抵餓二十年？淒涼成咁嘅長壽，好話唔好聽，唔要好過要。

咪以為功夫茶杞人憂天，有政黨尋日公布咗一項調查，原來喎，香港有好多長者真係生活艱難㗎。調查發現，六十歲以上受訪長者之中接近六成因為慳錢而減少外出參與社交活動；接近四成又為咗慳錢，有病都唔睇醫生；亦有兩成認為經濟壓力令自己無法解決溫飽問題。

呢個調查同時又發現，三分之一老人家總體上覺得自己生活得唔開心；三分之二認為政府照顧長者做得唔夠；接近一半覺得香港社會缺乏敬老風氣。

嗱嗱嗱，所以話啫，長壽未必真係好事。尤其以今時今日特區政府嘅施政作風，更加係涼薄到嚇鬼死你。

你想增加長者生果金咩？曾蔭權夠膽死企圖引入資產審查，如果唔係全人類嘈到拆天，呢個政治家都唔會縮番條槓。

你想入住老人院咩？得得得，等等等，等三五七年又唔定，等十年八載都唔定，總之你一定唔可以唔長壽，否則隨時等到死。唉，難得張建宗臉皮夠厚，佢話喎，特區政府投放大量資源支援長者、增加安老院宿位以及護理名額等等，希望能夠為長者提供最適切嘅服務。功夫茶想問一句，香港每年有千幾個公公婆婆輪候入住老人院期間死亡，咁就叫做最適切服務？

好嘞，你終於等唔切嘞，百年歸老嘞，想入土為安咩？得得得得得，等等等等等，政府骨灰龕嚴重供不應求，排隊輪候又係沒完沒了。

講到尾，喺香港做一個壽星公，唔係咁盞鬼㗎咋，政府口頭上話就話敬老，實際上乜都係得個樣。係呀，政府送出長者醫療券呀，可惜得二百五十蚊雞碎咁多，八成老人家索性唔用。係呀，政府話會增加安老宿位呀，不過只係二百幾個咁大把，家陣有超過六千位老人家排緊隊呀，大老爺！

好心張建宗啦，以後唔好再提香港人有幾長壽，盡量避免傷害風燭殘年老人家嘅脆弱心靈吖嘛！