新世界發展主席鄭裕彤長孫鄭志剛（Adrian）前日小登科，與中學同學余雅穎拉埋天窗，筵開一百六十席宴請城中名人巨賈，匯賢智庫立法會議員葉劉淑儀衣飾以銀灰色為主，身穿Armani外套配手袋，而同一色系嘅旗袍則係為是次宴會特別訂造，至於外套上以翡翠砌成向日葵形狀嘅心口針係出自本地設計師之手，為一身典雅造型點睛，盡顯貴氣。
葉太嘅丈夫葉文浩喺九七年不幸因病去世，但二人過往喺政商界係出名嘅恩愛夫妻，所以葉太絕對夠資格向一對新人傳授夫妻之道，她笑言：「學我咁，桄榔樹一條心。」
講番個婚禮，葉太話最令佢印象深刻係榮升老爺嘅鄭家純上台憶述兒子成長過程嗰幕，純官話Adrian由細到大都好獨立，令身為父親嘅冇乜好擔心，依家只希望新抱減少工作量，等佢可以早日抱孫喎。純官仲罕有地大談夫妻相處之道，笑言做老公最緊要「忍」，做老婆就要喺公眾場合畀足面老公，要跪玻璃、頂痰罐就閂埋房門先罰。