旅遊發展局早前舉辦嘅「香港美酒佳餚巡禮」旺丁又旺財，呢個佳績係業界同心合力嘅成果。不過，偏偏上任以嚟無甚功績嘅財政司司長曾俊華（鬍鬚曾）尋日竟然喺網誌中邀功，揚言：「活動充分顯示，香港正在加快成為重要的國際葡萄酒中心。這個發展是我去年在財政預算案中宣布豁免葡萄酒稅後開始的。」
鬍鬚曾話自從豁免咗葡萄酒稅後，葡萄酒貿易已催生咗大量商機，形勢令人「飲得杯落」，佢仲話：「放棄每年五億六千萬稅款是值得的，因為賺回的經濟效益和就業機會的價值遠遠超過這個數目。」不過，市民都記得，鬍鬚曾並非減酒稅嘅原創者，因為佢嘅前任早已定咗零酒稅呢個目標同方向，鬍鬚曾冷手執個熱煎堆，佢上任後將酒精稅減到零。
鬍鬚曾厚顏，竟然講到自己係近年葡萄酒大收旺場嘅功臣，凸顯政府可以攞出嚟炫耀嘅政策實在少得可憐，所以官員先會爭住邀功，以求叨光谷民望。