氣溫急降，英姿凜凜嘅女童軍卻唔怕凍，尋日齊集香港仔運動場舉行周年大會操暨頒獎禮，多位名媛應邀出席檢閱近六千名女童軍。人稱「零食王后」嘅四洲集團主席戴德豐太太戴胡美蓉亦以女童軍名譽副會長身份亮相。戴太原來係軍中嘅「零食之星」，經常贊助大包細包零食，令班女童軍大飽口福，不過私底下嘅戴太卻非常錫身，只揀健康零食，試食工作早已交咗畀公司試食隊代勞。
戴太老公就係人所共知嘅「卡樂Ｂ之父」戴德豐，不過戴太無老公咁為食，平日只揀唔太肥膩嘅紫菜同蘇打餅過口癮。身為二子一女之母嘅佢更注重健康，近半年開始聘請瑜伽老師上門教佢Keep fit。戴太話坐得寫字樓多，頸肩不時隱隱作痛，學咗瑜伽後人都精神啲。
查實做得女童軍都並非弱質女流，女童軍總會副會長梁王培芳出名幹勁十足，尋日掛滿一身「荷蘭水蓋」出場，包括金紫荊、銀紫荊星章、太平紳士勳章，最搶眼仲係心口一個「金鑽鯉魚章」，屬女童軍最高榮譽獎章，多年來只有佢同賭王何鴻燊得過呢個獎，梁太七三年就加入女童軍，賣力多年，認真功不可沒。
