香港人慣咗先使未來錢，買嘢碌卡極之普遍，出名牙擦嘅冠軍級練馬師簡炳墀就鍾意使「茄薯」（Cash諧音，即現金），褲袋長期袋住十萬八萬金牛，使錢一於現兜兜，唔使找卡數咁煩。
沙田馬場尋日舉行馬會125周年盃賽，食力簡都嚟捧場，佢自爆近年愛歎世界，除咗迷上高球，閒閒哋打到九十幾桿外，行街使錢絕不手軟，為證明「食力」，簡Sir二話不說喺褲袋抽咗一疊足有三吋幾厚嘅金牛出嚟，卓妮估計至少有十萬八萬。孭住咁多金牛出街，唔驚畀人打劫咩？簡Sir晒命話：「我買嘢鍾意畀現金，不過ＡＥ黑卡我都有張。」
食力簡荷包脹卜卜，恨死隔籬，不過政府給予長者嘅優惠，都唔會錯過。簡Sir順便晒埋身上一張長者八達通卡，話泊車時用佢「嘟一嘟」，方便好多。
四太怕畀燊哥怪責
尋日馬場仲有另一位貴賓，就係賭王四太梁安琪，佢代老公燊哥上陣為愛駒「爆冷」打氣，點知「爆冷」表現失準只跑尾四，激到四太紮紮跳，埋怨練馬師未有按佢要求派心水騎師策騎，扁晒嘴話：「下次練馬師揀騎師出賽，最好同我傾吓喇。」四太心情煩躁仲有另一原因，就係驚燊哥怪佢安排不周。
原來喺病榻中休養嘅燊哥全程
實賽馬轉播，睇見「爆冷」輸咗，一定唔開心喎。燊哥有精神刨馬仔，唔知聖誕節出得院未？四太話，屋企大宅裝修緊，沙麈滾滾，為免燊哥吸塵有礙健康，起碼要等到十二月先可以接佢歸家嘞。
金刀梁馬票大包圍
馬會尋日大玩懷舊，推出已銷聲匿迹嘅馬票玩意畀馬迷玩，行會成員梁智鴻伉儷都花咗四百蚊狂掃二十張馬票。梁太笑言小時候幫媽媽喺茶餐廳買過馬票，可惜未有中獎，金刀梁亦唔多清楚馬票嘅玩法，一於大包圍買晒成套，卓妮問佢係咪瞄準價值一千二百五十萬元黃金，志在必得？金刀梁笑騎騎話，中獎嘅話會搵埋卓妮幫手抬喎。
另一邊廂，甚少入場嘅浸大校長吳清輝亦嚟湊熱鬧，講起佢早前呻過樓價太貴買唔到樓，依家豪宅稍稍回落，佢話仍未有心水，睇怕退休後要做無殼蝸牛嘞。
卓妮