本文重點
沙田馬場前日舉行一年一度嘅樂聲盃，身為贊助商嘅「電器大王」蒙民偉公子——蒙仔蒙德揚當然有份出席，卓妮仲見到蒙仔帶埋位雪白嘅新玩伴「女朋友一號」入場。所謂「女朋友一號」，其實係佢公司代理嘅一款新型號數碼相機。
金融海嘯一年有多，蒙仔一見到卓妮就呻，雖然近排樓市、股市好似起番晒，但實情香港嘅經濟情況仲有隱憂㗎。就以佢老本行零售嚟講一直未見起色，充其量只能叫做穩定咗。
卓妮留意到蒙仔手上拎住部佢公司代理嘅新機，外號「女朋友一號」嘅Panasonic Lumix DMC-GF1。呢部相機面世唔夠兩個月，細部得嚟又可以換鏡頭，像素達到一千三百萬，價錢大約七千幾蚊，所以甚得網民好評，難怪蒙仔都唔執輸買番部喺馬場四圍影啦！
首部數碼相機
由蒙仔揸機嘅姿勢就睇得出佢係攝影發燒友，佢同卓妮講，做學生哥嘅時候已經迷上影黑白菲林相，尤其係影人像，以前屋企仲專登整咗間黑房，實行自己影、自己曬。近年數碼相機大行其道，蒙仔依然對菲林相機一直不離不棄，直至最近出咗呢部「女朋友一號」，佢先至獻出第一次。
除咗攝影呢啲文靜嘅嗜好，運動亦一樣啱蒙仔口味。以往蒙仔有游水嘅習慣，近年就出水能跑，轉戰鬥長氣嘅馬拉松，為咗備戰明年渣打馬拉松，蒙仔話依家一星期練跑三次、每次兩個鐘，唔知蒙仔出年能否締造佳績呢？
卓妮