係咁就好喇，可惜實情並非老人家唔使睇醫生，亦並非老人家唔想用醫療券，而係佢哋都唔知邊度可以用。試過有長者問勻多間醫務所先知，原來好多都用唔到醫療券呀老友！

話說有位陳婆婆有牙患多年，諗住用醫療券去睇吓牙醫啦，佢先向衞生署問清問楚區內邊啲牙科診所有參與醫療券計劃，然後根據資料逐一試吓預約。

點知陳婆婆唔問猶自可，一問把幾火。一間診所話第二次睇先用得醫療券，第一次叫佢唔該畀現金啦；另一間直頭話已經退出咗計劃；最後一間仲搞笑，居然話仲未正式參加計劃。陳婆婆拖到依家，醫生仍然未睇到，但已經谷到成肚氣嘞。

鬼咩，唔知衞生署究竟想幫長者，定係玩長者，居然諗出一套繁複到冇朋友嘅醫療券使用程序。你知啦，依家好多舊式私營醫療機構都冇電腦系統，要參加醫療券計劃，一定要先添置電腦以及上網。唉，未見官先打三十大板，隨時付出嘅費用，比醫療券嘅收益仲貴，難怪好多診所望而卻步喎。

咁都不特止，就算私營醫療機構肯裝新型電腦，都唔擔保一定識得點樣登入醫療券嘅網頁，部分醫護人員係電腦識佢，佢唔識電腦，見到程序複雜到痹，要輸入九百幾樣嘢，仲唔即刻投晒降咩。唔怪得好多醫療機構費事煩，紛紛打退堂鼓。

據資料顯示，依家有二千三百八十八名服務提供者已登記參加醫療券計劃，但其中一百零四名已退出。參與計劃嘅醫生愈來愈少，有券等於冇券，令長者得物無所用。

醫療券計劃劣評如潮，衞生署發言人顧左右而言他，聲稱市民就醫療券使用有任何意見或投訴，可向該署醫療券組反映。至於醫療服務提供者提供唔到預約服務，涉及好多原因，好難就個別個案評論。

好心咪再死撐啦，既然要幫長者，點解唔做好啲呢？點解係都要幫啲唔幫啲呢？冇錯，醫療券電子化確實可以減少浪費紙張，問題係，煲呔曾喺施政報告提出嘅慳電膽現金券，聽講都係白紙黑字印出嚟㗎啦，為乜醫療券唔可以用實物代替網上登記，減少不必要嘅上網程序？

如果話係為咗環保，咁就更加冇說服力，好多醫務所為咗參加醫療券計劃，被迫要掉咗部舊電腦，咁咪一樣製造好多電子垃圾，一樣唔環保。

計功夫茶話齋，做人難，做老人更難，做香港嘅老人難上加難。事關呢個政府講一套做一套，把口就冠冕堂皇咁講「老吾老以及人之老」，但實際上當長者係包袱，增加些少生果金都阿芝阿佐，派嗰雞碎咁多嘅醫療券又派到一塌糊塗。「老有所依」喎，「老無所醫」就真！