何教授雖然唔再係校長，但仍屬城大一分子，任城大商學院經濟及金融系金融學講座教授，講起當前經濟局勢，佢都有感而發，話早於兩、三年前即係金融海嘯未發生前，已提醒身邊朋友勿再揸美金，應轉買外幣，理由係美國印銀紙太多，加上借貸過度令美國房地產市場急速膨脹，遲早爆煲，可惜當時無人聽佢講，仲話佢傻，不過何教授唔理咁多，一於將部分身家轉買歐元。今時今日睇番轉頭，歐元已有近兩成升幅。

講番尋日個酒瓶展覽，全國政協委員容永祺都有撐場，原來藝廊老闆黃廣忠係佢老友兼教友，容永祺自爆日前率領香港專業及資深行政人員協會成員訪台，首飾設計品牌Qeelin創意總監陳瑞麟都有份，陳生順便喺台北搞新作發布會，請嚟國際巨星張曼玉亮相。容永祺巧遇大美人，驚嘆對方美麗如昔喎。