中國人自古以嚟都有分門分派，依家喺政府入面都唔例外；班女高官之中就有個「書法派」，佢哋跟名書法家高雲州學寫大字，陶冶性情之餘，個個仲練得一手好字。不過跟師傅學咗五年，「書法派」之一嘅運輸及房屋局局長鄭汝樺（Eva）就因為最近公務實在太忙，連續兩個月都上唔到書法班。
Eva尋日出席一個公開活動時話，舊年高師傅不幸中風後，佢哋已經搵咗個代課老師嚟教書法，不過就爆自己已經足足兩個月無去過上堂。不過走堂嘅唔只Eva一個，佢仲爆響口話，其他「書法派」高官，好似商務及經濟發展局局長劉吳惠蘭同民政事務局常秘尤曾家麗等，都因為太忙好耐無去上堂喎！唔上堂都唔緊要，但記得要沉住氣，面對議員傳媒辛辣嘅批評，千祈唔好好似煲呔咁畀憤怒吞噬咗靈魂就得嘞！
不過Eva都話，有時間會喺屋企練吓字，但無咗高師傅督促，成個人懶散咗好多，一個星期都寫唔到幾隻字喎！咁下一次嘅女高官書法展咪遙遙無期囉？點知Eva聽到個「展」字就耍手擰頭，話搞一個書法展實在有太多濕碎嘢要做，上年搞過一次都怕怕，睇嚟短時間內都唔會再搞。