醫學會Vs西醫工會

醫生係專業界別，不過同業之間嘅恩怨爭拗，並唔少得過其他行業。醫學會同西醫工會都係代表私家醫生，不過，前者多為專科醫生，後者則以屋邨醫生為主，所以成日互唱反調，最新一件打對台事件，就係屋邨醫生罷診行動。

醫學會會長謝鴻興批評，醫生罷診，影響專業形象，而業內有個別人士，為咗個人利益，搵病人嘅健康做籌碼，除咗唔道德，罷診醫生仲可能畀病人向醫務委員會投訴違反專業守則，請各位醫生三思咁話。謝鴻興強調，醫學會一直有做嘢，幫同業監察領匯，仲透露經前會長蔡堅同領匯斡旋，解決方案已露曙光，意思即係叫大家畀啲耐性，唔好受西醫工會嗰套。

謝鴻興同楊超發都係兒科醫生，不過，隔空駁火，絕對唔係小兒科，句句有骨，拳拳到肉。楊超發翻謝鴻興舊帳，話○七年非合約制公立醫生爭取同工同酬罷工靜坐行動，謝鴻興都有參加啦，全港邨醫抗衡領匯，同非合約制公立醫生爭取加人工相比，邊個嘅私利成分重啲呢？又指謝鴻興有關病人投訴罷診醫生嘅言論有恐嚇成分，突然狙擊罷診行動，只係想喺對抗領匯加租一事攬功。嘩，睇嚟楊超發似乎真係動了真火，醫學界烽煙驟起。

其實，醫學會同西醫工會打對台，已經唔係第一次。上年九月立法會選舉，醫學界議席競爭相當激烈，楊超發掛正西醫工會會長旗號參選，而醫學會就被傳背後力撐民主派「香麒麟」之一嘅郭家麒競逐連任，雙方壁壘分明，互相分薄票源，最後亦雙雙落空。今次邨醫罷診爭拗，睇嚟醫學會同西醫工會新仇舊恨，終於好似火山爆發咁一次過爆晒出嚟。