煲呔曾忽然休假四日，好多人都估到佢係離港去旅行避難，但估唔到去到北海道咁遠，趁金秋十月賞紅葉，肯定又揸住相機周圍影，聽聞話佢想同家人出外抖一抖喎！煲呔曾自己就風花雪月，喺香港做佢替工嘅政務司司長唐英年，被傳媒問起煲呔曾弟婦搵「曾朋友」石禮謙出面、提早就雷曼債券追討到賠償單嘢，唐唐立即騰晒雞兼口窒窒，都唔知點解畫，愈描愈黑，呢啲咪係累人累物累街坊囉！

有消息話，上周日一班好友在馬會設宴祝賀煲呔曾結婚四十周年紀念，但身為主角嘅佢因為醜聞纏身，被迫臨時放飛機避風頭，點知甩底變露底，搞到佢班「曾朋友」曝晒光，所以北海道之行係補番慶祝，最低限度去到日本唔使聽到「慳電膽益親家」呢六個字。

施政報告年年出醜唔知衰

煲呔曾每年發表施政報告，每次都令佢出醜，導致煲呔曾政府飽受批評，今年亦不例外。首先被揭慳電膽現金券明益親家，到依家水洗都唔清，難為市民仲要無端端被迫加電費。近期豪宅創天價，中產置業困難，但煲呔曾竟然話「豪宅價格飆升不影響民生」，仲叫市民去偏遠地區買樓，難怪連佢嘅內閣智囊、行政會議成員張炳良都公開唱反調，話豪宅天價帶動中小型樓價上升，提議復建居屋，變相摑佢兩巴。

最新鮮熱辣嘅係我哋又踢爆其弟婦透過「曾朋友」、立法會議員石禮謙協助下，提早獲得銀行回購雷曼迷債，利益瓜葛又係糾纏不清，未知點收科。後欄起火，難為煲呔曾仲好意思同太太去日本樂逍遙；與其一身蟻避走北海道，不如快快返香港認衰，收拾殘局罷啦！