冇錯，財金高官成日出嚟吹水話經濟見曙光，不過呢啲曙光係照官唔照民。實情係好多打工仔都係在職貧窮，勒緊褲頭慳得就慳，之但係車費就點都冇得慳，如果日日搭巴士山長水遠出市區返工，車費已經去咗一大橛，幾乎等於同巴士公司打工，邊度頂得順呀！

咦，唔係喎，港府唔係喺○六年引入「可加可減」機制，話等市民喺經濟不景時唔使捱貴車費咩？唉，係就係有個可加可減機制，可惜眨吓眼三年嘞，車費加多減少，有機制等於冇機制。當局仲煞有介事話檢討機制之後，認為可以平衡巴士公司同埋市民利益，建議繼續沿用。

係真唔係呀？可加可減搞咗咁耐，小市民照樣要捱貴車費，巴士公司最多間唔中搞埋啲細眉細眼嘅優惠敷衍吓就算，咁都叫平衡巴士公司同埋市民利益？

嗱，有立法會議員就講得啱啦，佢批評呢個檢討唔完善，冇考慮到近年來市民工資普遍下調，但交通費反而上升嘅不合理現象。港府冇督促巴士公司改善轉乘優惠以及全面實施分段收費，亦令到嗰啲住喺偏遠地區嘅市民被迫畀多啲車資。

唉，高官個個坐豪華座駕返工，點會知道好多小市民日日搭巴士返工，都要轉車一次或以上至可以出到市區吖。最弊巴士公司提供嘅轉乘優惠，條條線都唔同，令乘客要畀多啲車費，甚至可能要比單程更加多，咁都叫平衡市民利益？

仲有呀，巴士公司至今仍然未全面實施分段收費，搭幾個站就要畀足全程車費，其實係變相壓榨冇坐足全程嘅乘客，好明顯就係唔公平啦！

運輸及房屋局死撐話鼓勵巴士公司搞轉乘優惠，係希望減少開辦點對點嘅長途路線，至於長程路線提供短程嘅分段收費，由於存在技術問題，巴士公司好難監察乘客落車嘅情況，所以要研究一下。

唔係啩？乜嘢技術問題咁難搞呀，用咗三年時間都未研究到？神舟七號都上咗太空啦！講到尾，其實係當局闊佬懶理就真，搵咁多藉口無非為咗卸責啫。

唉，呢啲咪叫做上樑不正下樑歪囉。呢嗱，曾蔭權近日好搞唔搞，學人搞環保，卒之搞咗個慳電膽益親家嘅醜聞出嚟，反而最應該搞嘅淘汰舊款巴士卻拖得就拖。換環保巴士絕對係刻不容緩，近日大家只要望出窗外，一片灰蒙蒙，就知道空氣污染又爆晒燈啦。弊在當局只係識得恐嚇話淘汰舊款巴士會令巴士票價升一成半，將成本轉嫁畀市民，即係話，想改善空氣質素唔係唔得，大家有心理準備要出錢，否則空氣質素改善唔到，就唔好怪政府冇做嘢嘞。

算罷啦，特區政府無監無管，對住巴士公司腳仔軟就梗㗎啦，小市民都唔好再嘈咁多，唔係到時成班官員又話壓力大，又話冇士氣，要求加人工補番，而且仲要請多幾個副局長及政治助理幫輕吓，咁納稅人又要大出血咯。