豪宅創出天價，中小型樓價又被牽引緊隨上升，搞到有自稱中產嘅專業人士打上電台話買唔到樓，於是有人問：點解要現階段買貴樓呢？我哋早前喺香港會門外遇到房協主席楊家聲，佢話香港經濟及樓市有循環周期，有升自然有跌，叫人千祈唔好因為一時衝動急於買樓，否則成世人幫層樓打工。
楊家聲話，公營房屋與私樓各佔香港樓市一半市場，私樓市場內有部分係炒家，當炒家手上物業囤積到某程度時，自然就會將物業出售或放租，樓價自然會調整，到時買樓都未遲，所以毋須在樓價高峰期買樓。佢話：「千祈唔好因為一時衝動去買啲個人能力未能負擔嘅樓宇，否則成世人幫層樓打工，可以選擇暫時租樓住住先。」
話口未完，楊家聲前日主持房協筲箕灣混合住宅項目動土儀式後又提到樓價問題，都係叫市民買樓要量力而為，顧及個人嘅經濟能力。雖然楊家聲講得好有道理，但如果政府一日唔插手穩定樓價，市民係咪唔使旨意買樓呢？抑或焗住要退而求其次，學煲呔曾話齋，走去偏遠啲嘅地區買樓？