耳濡目染有時都可以係反面教材，太古（中國）主席陳南祿就係因為有一個愛吞雲吐霧嘅爸爸，令佢遠離煙仔。尋日祿哥出席喺金鐘舉行嘅「服務香港15年 培育健康新一代」展覽會開幕典禮，同場仲有署理行政長官唐英年擔任嘉賓。同輩壓力最易度人升仙，但祿哥話當年佢爸爸成日喺屋企食煙，令佢對煙仔好反感，因此從小就唔愛吸煙，亦無受同輩影響而吸食第一口煙。出嚟工作，祿哥避得開煙，應酬都避唔開酒啦，但祿哥就有計仔避開喎。
原來十幾年前，祿哥因工作關係成日要返大陸公幹，每次都畀人「隊」，幾啖烈酒就搞到佢滿天星斗，都咪話唔辛苦，加上依家年紀有番咁上下，更加明白酒乃穿腸之物，都係少沾為妙。依家佢出嚟應酬，每次都會攞一杯做「道具」，唔會真係飲落肚，其他人見佢攞住杯酒「啷下啷下」，自然唔會逼佢飲，呢招都咪話唔醒！佢仲教落仔仔就算真係避無可避要飲落肚，都係淺嘗好啦，千祈唔好搞到酒後鬧事或者酗酒。