事緣肥胡早前出席一個電台節目，講到政府既然有心搞醫療產業，理應吸引多啲海外頂尖專家來港，建議放寬佢哋嘅註冊關卡，考慮畀佢哋唔使再考牌就可以喺香港行醫。身為醫務委員會成員嘅蔡堅醫生對呢番說話反應好大，搬咗一大堆數據出嚟反駁。佢話本港一直有一套針對海外醫生來港執業嘅制度，其中有百幾人喺醫管局工作，唔一定要考牌；另一批就要向醫委會考牌後先可行醫，呢類個案亦有千幾人，根本就唔需要額外再諗放唔放寬。

佢擔心實情係政府想修改現時嘅制度，借助肥胡把口嚟「出口術」。

同場嘅醫學會現任會長謝鴻興醫生亦幫口，話現時制度行之有效，又話香港人一直相信制度，就係唔想有人靠關係濫竽充數，諗唔到今次因為一句說話而搞出個小風波。