本文重點
施政報告提出嘅慳電膽政策，搞出個煲呔曾明益親家嘅風波，事件至今仍未解決。還未換上慳電膽嘅立法會，前日就被三盞射燈「搞掂咗」，三盞會議廳內嘅射燈，有能耐令立法會整棟立法會大樓停電，幸好前晚機電署搶修成功，令尋日舉行嘅內務委員會會議可以順利進行。
燒Fuse短路跳掣
立法會至今已有廿五年歷史，前日早上財經事務委員會喺立法會舉行會議，會議進行期間，整棟大樓忽然停電，幾分鐘後後備電源啟動，會議雖然繼續進行，不過因為語音系統未能回復正常，官員及議員喺無咪高峰使用嘅情況下開會，加上依靠後備電源照明，燈光亦較平時暗淡，連帶抽風系統及走廊照明都受影響。
鑑於大樓已有廿多年歷史，立法會秘書長吳文華話，懷疑停電與大樓老化有關，亦不排除是電器故障或漏水導致停電。
不過經檢查後，吳文華尋日話今次停電事件是因為會議廳立法會主席頭上三盞射燈燒咗，導致短路跳掣，經機電署復修照明系統已恢復正常。