「五區總辭」由社民連提出，建議五區各由一名泛民議員請辭，最初公民黨質疑效用，後來忽然進取，提出「先談判、後補選、再總辭」策略，即先要求煲呔曾就二○一二年嘅政改諮詢一併提出真普選路線圖，否則泛民進行五區請辭；如果喺補選後仍未能交出路線圖，廿三名泛民議員就集體請辭。不過，白鴿黨對於上述種種建議，一直猶抱琵琶半遮面。

改口毋須投票門檻

白鴿黨聲稱內部對「五區總辭」存在分歧，上月底召開政改座談會，結果一如所料，反對者眾多，最終未能達成共識，話要等政改諮詢方案出爐後才決定係咪支持。一句講晒：「戀棧權位。」正所謂「避得一時，唔避得一世」，社民連講明，白鴿黨無得避，認為泛民要最遲喺政改諮詢文件出爐當日提出「五區總辭」，否則等同宣示泛民分裂。

正當大家等睇戲之際，尋日泛民飯盒會竟然通過今後討論再沒有「五區總辭」常設立場，即係傾唔傾都得，或者考慮其他方案，變成可有可無。

至於早前有學者提及「五區總辭」補選應有三分之二選民投票門檻才有認受性，但泛民尋日卻話毋須訂立門檻，指門檻難以量度真實民意喎。如果投票率低到得一成又點呢？莫非泛民諗住將二○一二年雙普選訴求強加諸市民？

事到如今，即使公民黨同社民連繼續堅持「五區總辭」，但看白鴿黨個勢都似係龜縮居多，即使如傳聞所指，最後要女助理醜聞纏身嘅甘乃威代表辭職，被公民黨列入名單嘅民協馮檢基都未必同你癲，所以睇怕泛民都係一盤散沙，有頭威無尾陣，變成鬧劇一場機會大啲。