港產環保電動車MyCar尋日回港開售，生產商喺合作研發嘅「娘家」理工大學舉行開售儀式，卓妮一早去霸頭位，見證呢個展現港人汽車研發成就嘅一刻，身為理大校董嘅合和實業董事總經理胡文新、港鐵及醫管局都有入貨支持本地貨。政府呢排勁推電動車，幾百幾百萬送去日本買來路貨，但偏偏望都唔望吓香港製造嘅MyCar，難怪生產商高層揶揄政府「阿媽唔幫仔」，而搞環保嘅環境局局長邱騰華為慳電膽單嘢，尋日「潛水」避風頭！
唔知買咗乜顏色
MyCar今年初先後在英、法、意、奧及丹麥等發售，至今賣出五十多部。在港推售嘅右軚版本，性能與歐洲一樣，最高時速為六十四公里，暫時未能上高速公路，一般家用插座充電六至八小時後，可在平路上行走一百一十公里；行走二十公里後即加充，則只需個半鐘。無冷氣版本售九萬七千元，改用鋰電兼加冷氣，就盛惠十五萬元。
今次港產MyCar回家，大把人爭住支持，未開售已經「暗盤」入貨嘅機場管理局、港鐵同胡文新都畀面出席，熱鬧非常。成為首名港人買家嘅胡文新，既係理大校董又係電動車督導委員會成員，佢話買架MyCar用來代步，貪佢細架易「就位」，方便穿梭港島，最重要係環保慳能源。不過佢認真搞笑，問佢架車揀咗乜色，佢竟然擘大口得個窿，問完助手先知係銀色，仲話MyCar係佢第一架擁有嘅電動車。胡文新出名鍾意靚車，問佢呢架係佢第幾架車，佢就笑一笑當係答咗。
機管局行政總裁許漢忠就話買咗三架MyCar都加晒冷氣，主要畀員工喺停機坪巡跑道同停機位時用，事關停機坪嘅車速限制係三十至五十公里，啱晒數。
邱騰華潛水避風頭
呢邊群星拱照，但政府嘅反應就異常冷淡，邱騰華唔見影，搵財爺曾俊華同商務及經濟發展局局長劉吳惠蘭撐場，點知坐完車做完騷又快閃，難怪生產商EuAuto行政總裁鍾倩玲都叫卓妮幫吓口叫政府支持港產車，佢甚有怨言話：「有個小朋友做勞作，喺外國得咗獎，作為本地嘅家長係咪要支持吓！」主席孫國華就手下留情，政府肯買電動車已經幫咗，起碼會有多啲叉電站，對整個行業發展都好喎。
卓妮