人哋深圳段預計二○一二年已經可以啟用，香港要再過多三年先至有貨交，遲係遲咗啲，不過遲到點都好過冇到。高速鐵路有幾高速？又確係相當快㗎，列車時速最高達三百五十公里，隨時快過小型飛機，去廣州只需四十八分鐘，去北京都只係十小時啫。功夫茶記得，細細個由廣州搭火車去北京，最快都要三十三小時。

咦，咪住先，受到工程影響嘅石崗菜園村村民肯搬咩？咁又唔知噃，政府淨係拋出一個加碼賠償方案，大概係話盡量鬆手，賠屋賠錢又賠地，不過聽講部分村民嘅初步反應係點賠都冇得傾，堅持不遷不拆咁話。萬一，菜園村村民企硬，會有乜嘢後果呢？斷估香港政府唔會學似內地惡霸使橫手打人迫遷咁毒辣啩。

話時話，菜園村成件事好可能係緣於一個錯誤決定。乜決定？點錯誤？等功夫茶慢慢話過你知。

嗱，當初高鐵總站位置有兩個選擇，一係新界北，一係九龍西。假如總站設於新界北，工程簡單得多，費用節省更多，之不過咁，政府話喎，總站梗係設於市中心最好啦，所以就揀咗九龍西。於是乎，一連串問題出現嘞，由於鐵路貫穿市區，所以軌道唔可以架設地面，一定要採用隧道設計。由於要喺地底掘隧道，所以工程又緩慢又昂貴。貴成點？巴閉咯，架勢咯，短短二十六公里，費用預計五百三十七億，加埋非鐵路項目嘅接駁工程一百一十五億，埋單總數超過六百五十二億。換言之，平均一公里工程耗資二十五億，同鋪金磚冇乜分別。呢個平均公里嘅造價係英法海底隧道嘅三倍，如無意外可以列入健力士世界紀錄。

選址九龍西仲有一個問題，全線係密封隧道吖嘛，一出意外就好大鑊，為咗安全起見，必須於中途設置露天救援站，所以就要徵用石崗菜園村二十幾公頃土地嘞。結果，就導致你肯賠人哋都未必肯搬嘅爭拗。

另外，九龍西總站設計十分騎呢，由於空間太細，唔夠地方畀列車停落嚟掃地抹櫈搞衞生，所以就會出現一個怪現象，列車到咗總站之後，必須空車駛十六公里去石崗清洗，洗完白白嘞，再一次空車折返總站接客。一來一回三十二公里，你話浪費幾多能源呢？

有冇人向政府提議過總站不如設於新界北呢？當然有啦，由民間專家組成嘅公共專業聯盟，曾經為政府出謀獻策，如果佢哋嘅方案得到接納，估計可以節省二百五十億至三百億費用。可惜吖，官僚主義當然高高在上自以為是，冇可能紆尊降貴聽取民間意見嘅，所以就一意孤行嘞。

點都好啦，都米已成炊咯，冇理由到咗今時今日先至緊急叫停推倒重來。高鐵係就係好鬼死昂貴，貴到未必物有所值，不過事到如今，功夫茶唯一可以做嘅就係獻上無限祝福，嗱，求神拜佛成個Project唔好仆直。你知啦，咁貴嘅工程一旦仆直，唔知邊個問責高官又要死直！