唔敢教拆「膽」

辭官後勁減十幾磅嘅肥亨尋日接受電視訪問，地點揀喺情調十足嘅淺水灣酒店，美食當前，肥亨為血壓着想，睇得唔食得。近期官場接連爆大鑊，肥亨看在眼內，感覺應該比眼前嘅精緻菜式更精彩。不過肥亨做人留一線，唔評論辣㷫全港市民嘅慳電膽風波，話「不在其位，不謀其政」。肥亨當年為官時拆彈招數有一手，其首創嘅九十度鞠躬姿勢更係無官能及，可惜煲呔曾頸太硬，難怪肥亨都話唔敢教佢點拆彈。

講完為官之道講金價勁升，肥亨發揮前財金高官本色，話依家全世界都擔心通脹升溫，所以將黃金當成資金避難所，咁到底係咪時候買定金條保值呢？肥亨唔敢寫包單，話總之分散投資最實際，千祈咪獨沽一味買一樣。恒地四叔李兆基早前貼中澳元會勁升，果然言中，肥亨就謙稱唔識睇外匯，話影響外匯波動嘅因素太多，即使今日買得準，未必代表六個月後仍然適用喎。