一班煲呔曾「曾朋友」日前喺跑馬地馬場搞咗神秘飯局，慶祝佢結婚四十周年，但飯局主角因為捲入慳電膽醜聞而臨時甩底，要一眾出席嘅政商界名人度橋解畫，其中畀我哋喺現場影到嘅行政會議成員楊敏德，尋日仲同記者玩捉字蝨，唔認有去「曾朋友」飯局。
尋日行會散會後，冇份出席「曾朋友」飯局嘅行會召集人梁振英同成員張炳良，都有主動就慳電膽事件幫煲呔曾向傳媒解畫，反而有去飯局嘅梁智鴻同楊敏德就冇咁做，開完會就閃。記者追上去問楊敏德係咪有去「曾朋友」飯局，佢居然話自己「冇去」。但明明影到你喺現場喎？佢就聲稱當晚只係去「一般食飯」。乜餐飯唔係慶祝煲呔曾結婚四十周年嘅咩？佢竟然話：「我都唔知！」
有與會者就實牙實齒話，楊敏德當晚肯定在場，仲噏得出佢同城中一位超級富豪二代同枱，不過佢唔認餐飯係為煲呔曾慶祝結婚周年紀念，只當係一般食飯，咁樣玩捉字蝨，理論上冇錯嘅。不過，坊間一直盛傳楊敏德同煲呔曾關係好好，所以佢當晚有份去「曾朋友」飯局，一啲都唔令人意外！