王會長尋日同傳媒講起成長往事，原來夠晒星光熠熠。王會長中學時就讀聖芳濟書院，同校猛人如雲，李小龍就曾以師兄身份返母校做校慶頒獎嘉賓，同學即興叫李小龍除衫影相，結果李小龍脫去上衫展示六舊腹肌，可惜王會長當日不在場，錯過呢幕真人騷，諗起都覺得可惜。

猛料師兄仲有許冠文，王會長話許冠文高佢四屆，當年讀書時已盡顯搞笑本色。不過講到接觸最多嘅明星，就非曾志偉及鄭裕玲莫屬，志偉同佢係中學校友兼波友，經常落場較量球技，可惜長大後各有各忙，好少聯絡。

至於鄭裕玲又係乜嘢淵源呢？話說王律師讀中大歷史及語文學系時，曾經喺某日校兼職教英國文學及經濟，鄭裕玲就係佢學生。佢話當年嘅DoDo恨做明星恨到發晒燒，經常走堂去試鏡，估唔到呢位學生妹，今日已搖身變成獨當一面嘅金牌司儀。