本文重點
行政會議尋日就廣深港高鐵撥款及賠償方案拍板，有份幫手協調受影響村民賠償嘅行會成員、鄉議局主席劉皇發，晨早開完行會後，隨即到灣仔皇朝會參加全國政協副主席鄭萬通嘅訪港午宴，未食完又要趕到石崗菜園村，協助官員講解最終收地賠償方案，之後仲要返九龍塘鄉議局主持會議，呢位年逾七十歲嘅老人家由朝到晚馬不停蹄，魄力仲好過啲高官。
歎足40幾年
發叔下午四點幾搞掂鄉議局啲手尾後，就拉埋愛兒劉業強及黃宏發等幾位鄉紳到尖沙咀半島酒店Coffee Shop歎番個遲來的下午茶，飲杯紅茶，食件三文治，吊頸都要抖吓氣嘛！發叔話幫襯咗半島四十幾年，皆因鍾意半島樓底高，感覺特別舒服，平日每逢開完會都會去飲茶，星期六、日就舉行家庭聚會，得閒又會約太太去坐吓，去得多自然產生咗一份感情。
卓妮問發叔一日跑幾場攰唔攰？佢就笑笑口話：「有嘢做唔辛苦，工作咁有挑戰性，雖然個人好攰，但精神一啲都唔攰喎！」菜園村風波事到如今，發叔希望和平解決事件，他坦言，加碼後嘅賠償方案已經係最着數嘅方案，希望堅持不遷不拆嘅村民忍讓同冷靜，顧及大眾利益，事關廣深港高鐵起唔成，香港就會被邊緣化；如果總站搬到深圳，香港等於見水都飲唔到。唔知班堅持不遷不拆嘅居民，最終嘅取態如何？
卓妮