中文大學校董會近排動作多多，繼早前宣布校董會主席由身為舊生嘅滙豐中國主席鄭海泉出任後，尋日政府又宣布委任多一個中大校董會成員，同樣係舊生嘅冠軍科技集團主席簡文樂（Paul）由下個月二十七日起，開始出任母校嘅校董會成員，任期三年。
阿Paul雖然係科技人，但醉心佛教藝術同文化，早排佢攞咗自己珍藏嘅二百一十六件菩薩尊像出嚟搞展覽，話到明對於現今社會道德淪喪、商人賺快錢嘅現象好痛心，希望展覽可以教化人心。今次佢返中大參與管理，會唔會趁機推廣吓道德教育呢？
唔講唔知，阿Paul都係中大ＭＢＡ舊生，同中大淵源甚深，佢間上市公司亦好鍾意請中大人，去年中大有個校友賽馬日同校友會聯會盃，佢仲有份出資贊助添。今次回歸母校參加管理工作，令佢同中大嘅關係更密切。中大校董會依家已經有唔少舊生，今次又添一員，要搞舊生俱樂部真係話都冇咁易！