煲呔曾周三發表一份「無糖」施政報告，劣評如潮，只一味叫市民「慳啲」，近日仲被揭發佢親家原來係賣慳電膽，涉嫌有利益輸送，怪唔得好多市民嬲到打上電台怒斥煲呔曾。民怨燒到埋身，但煲呔曾尋日出席立法會主席做東道主嘅午宴時，竟然仲誇誇其談，大談美食及養魚經，認真不知所謂！
立法會主席尋日筵開六圍宴客，多位政府高官、行會成員及議員都有出席。煲呔曾同主席、捲入慳電膽風波嘅環境局局長邱騰華、公文袋陳淑莊、富貴黨張宇人及工聯會黃國健等人坐埋同一席。據聞席上黃國健曾經指住天花板上嘅電燈膽，話呢啲都係慳電膽，點知煲呔曾當聽唔到，其他人都冇接落去，莫非大家想放佢一馬？
講食經埋怨錦鯉色澤
不過，唔知煲呔曾係咪嫌枱上嘅菜式太乏味，主動問在座議員知唔知邊度有惹味嘅潮州菜、上海菜同燒中豬食，正經嘢唔講，竟然仲有心情風花雪月搵好嘢食，怪不得社民連鬧佢不顧窮人死活喇！
講完食經，煲呔曾仲講到佢自己心愛嘅錦鯉魚。佢埋怨禮賓府養咗多年嘅幾條錦鯉魚色澤淡咗啲，唔及日本錦鯉咁鮮艷奪目，佢仲好有研究咁話，可能同花園養咗雀仔、啲雀屎跌落錦鯉魚池影響水質有關。與其花咁多時間去研究點樣養靚錦鯉，不如落多啲心機諗吓點樣為香港搵出路好過啦！
鬍鬚曾無諗過驗心臟
相比之下，病愈復出嘅財爺曾俊華顯得沉靜得多，鬍鬚曾同白鴿黨張文光、李永達、詹培忠等坐另一圍。剛通完波仔嘅鬍鬚曾冇戒口，飲咗四分一杯紅酒，鬍鬚曾本來想再添飲，但張文光怕佢出事，擋住唔畀佢飲。鬍鬚曾酒後吐心聲，慨嘆一個人睇嚟健康唔代表無病，仲自爆年年有驗身，可惜因為血糖及膽固醇都無超標，從無諗過要驗心臟，呢次喺屋企病發都算夠運喎！
財爺大病初愈，不過佢司機就病咗，尋日下午三點半揸埋財爺座駕去律敦治醫院睇醫生，一度惹來財爺不適入院疑雲。財爺司機解釋話，唔舒服嗰個係佢至真，叫大家咪多心。
卓妮