聚餐好似上次咁喺上海總會舉行，經濟動力、五散人、詹Sir二人組及民建聯等派別統統齊晒腳，專業會議只欠石禮謙一人，但工聯會及自由黨分別派黃國健及劉健儀做代表。

飯局上雖然未有再提施政報告，但講起社民連朝早出玩具蕉掟紙板掟中立法會主席，大家達成共識，話事件比上次「飛蕉」更過分，要聯手還以顏色。席間亦有人講起甘威事件，有人主張徹查，畀公眾一個交代，亦有認為事件無原告，唔知點查噃。有份食飯嘅黃國健就話，彼此仍處於磨合期，相信食多幾次飯之後會建立互信，有助日後協調意見喎。餐飯最後由詹Sir埋單先，但聽講係ＡＡ制，會夾番錢。

據聞席間都有傾政改，但就同意等政府公布政改諮詢後再具體傾，佢哋仲約定十一月二十七日（周五）再開飯；計計數，煲呔曾嘅政改諮詢報告將於十一月出爐，建制派月尾食飯，唔通意味政改報告會喺嗰個星期推出？