立法會首次出動彈劾議員機制，處理民主黨議員甘乃威涉嫌求愛不遂事件。聞說專業會議議員梁美芬有意爭取做調查委員會主席，若然成為事實，甘威就真係金過九九九千足純金，事關處理過性騷擾個案嘅梁美芬講過，一個眼神都可能中招，甘威都係要自求多福。
為咗籌備調查甘威單嘢而成立嘅小組委員會，截至尋晚六點有七個議員參加，包括吳靄儀、劉健儀、梁美芬、梁劉柔芬、梁家傑、林大輝同葉國謙，本來名單上仲有黃宜弘同張宇人，但查明純屬報錯名。
記得上周五內務委員會上，梁美芬話佢處理過唔少性騷擾個案，仲話一個眼神都會中招。我哋問過梁美芬，佢承認有唔同黨派嘅議員都建議由佢做調查委員會主席，所以佢會認真考慮，最終都要睇吓大家意思先喎！
依家已經無乜男議員敢明刀明槍撐甘威，好似話過「表示傾慕」無罪嘅林大輝都話，入小組委員會只係有興趣了解吓程序。不過，喺小組委員會做完籌備工作，跟住就要成立調查委員會；如果真係由梁美芬做調查委員會主席，甘威肯定有排煩！