飲得、食得、煮得兼評得嘅前經濟發展及勞工局局長葉澍堃（Stephen）尋日去咗個香檳試酒會，順便教我哋點樣可以飲得清醒，關鍵就係水喇！Stephen話酒係用嚟享受嘅，所以飲到咁上下就要停；如果有醉意，就可以飲多啲水，沖淡之餘仲唔驚會脫水。
Stephen尋日試嗰支係Armand de Brignac Brut Gold，佢話依家呢個世代好少有清純嘢，但支酒就夠清夠純。不過講到至愛，專一嘅Stephen話紅酒幾時都係佢首選，但鍾意紅酒啲咩，佢就話唔可以用言語解釋。咁又係，喜好嘅嘢邊有得計呢？早前Stephen帶埋太太一齊去法國拍旅遊節目，參觀咗四個釀酒區，其中一個仲係香檳區。講開至知，原來飲香檳一直係皇帝享受，古時好多皇帝都喺酒莊加冕，但Stephen話自己係平民，老婆亦唔係女王，佢哋屋企人人都好平等。
由Stephen擔任籌款委員會主席嘅小母牛，月尾喺維園舉行籌款活動，雖然今年經濟麻麻，但Stephen話依家已經籌到五百幾萬，仲請到Soler、Chita Yu做演唱嘉賓，李小鵬同劉璇都會嚟，相當熱鬧！