回想金融海嘯一役，喺金融界身經百戰嘅Peter難免露出心狠手辣一面。佢話大企業喺海嘯期間走下坡，必須要「Change」（轉變）先有望維持落去，而其中一個解決方法就係裁員。Peter解釋，勞工開支佔公司成本大，如果經濟差冇生意，其實公司都冇嘢可以畀員工做，所以一開始忍痛裁二、三百人，總好過最後捱唔住而令所有人都要打爛飯碗。Peter強調，下裁員決定前必先衡量得非常清楚，而且上述言論純粹係佢個人意見，並唔代表滙豐立場。

Peter呢一套企業浴血重生理論唔知打工仔受唔受，不過滙豐由舊年開始數度裁員，但本月發表嘅員工意見調查報告指出，亞太區員工投入度竟然不跌反升兩個百分點，到百分之七十一。唔通裁員一着真係可以令避過一劫嘅員工居安思危，更加落力工作？

傳授CEO哲學三部曲

Peter係第一個華人出任滙豐亞太區行政總裁，絕對夠資格向年輕一代傳授CEO之道。佢話CEO哲學有三部曲，先要羅致人才，然後增加企業嘅市場佔有率，做到頭兩樣自然可以建立企業品牌。佢笑言，當滙豐年初跌到要定出二十八蚊供股價時，人人都大喊：「Oh my God！」不過由於滙豐多年嚟已經喺港人心中建立起良好嘅品牌形象，所以最後差唔多係全民供股。

尋日嘅分享會喺中大舉行，主持人Jeffrey都好識做，一開口就先恭賀中大前校長高錕攞諾貝爾物理學獎。同樣係聖若瑟書院舊生嘅Jeffrey一講起呢位師兄就讚不絕口，佢話自己做聖若瑟校友會會長時，搞親活動高錕可謂逢請必到，而且為人和藹冇架子，作為華人典範當之無愧。