中秋佳節冇得人月兩團圓，固之然係人間慘事，其實更加得人驚嘅係，全人類一夜之間恍然大悟：咦，香港作為繁榮安定國際大都會，乜仲有寮屋嘅咩？寮屋唔係拆晒哩咩？火燒寮屋唔係上世紀先至有嘅集體回憶咩？

冇錯，九華徑村係寮屋，即係最簡最陋最殘缺不全嘅房屋，建築材料可以係木頭，又可以係鐵皮，防火功能接近零，總之一有火警隨時串燒。講開又講，閒話一句，唔知邊條天才茂里幫東南亞一個國家改名做「寮國」，好唔尊重啫！

九華徑村火燒連環屋當然係慘絕人寰，原來全香港仍然有好多危機四伏嘅寮屋區，分布於沙田紅梅谷村、馬鞍山村以及荃灣老圍等等。呢鋪真係一燒驚醒夢中人，功夫茶一直以為，香港窮人一係住籠屋，一係瞓橋底，勢估唔到仲有一個選擇，就係住寮屋。

愈講愈驚嘅係，政府官方數字顯示，目前全港有七千間已登記寮屋，居民一萬四千人，而根據鄰舍輔導會嘅估計，全港十六個寮屋區實際上住咗二十萬人。假如估計屬實，即係有十八萬幾個「黑市人口」！

因乜事幹會有咁多寮屋居民？講到尾，又係失敗嘅人口政策惹禍。內地新移民不斷來港吖嘛，佢哋大部分係草根階層，私人樓租太貴住唔起，申請公屋又因為居港未滿七年而冇資格，唔想瞓街咯喎，咁咪住寮屋囉。

二十萬人住寮屋，你都咪話唔恐怖。試諗諗，寮屋電線亂咁搭，傢俬雜物亂咁放，家家戶戶又用罐裝石油氣，一旦火燭，隨時好似燒着火藥庫，砰砰嘭嘭炸到七彩。即使唔火燭，打風落雨一樣牙煙到極，水浸已經算係濕濕碎，萬一山泥傾瀉，咁就死得人多。

喂，功夫茶就話孤陋寡聞啫，乜神通廣大嘅政府唔知問題存在嘅咩？社區人士透露，佢哋曾經多次向政府建議，為寮屋區制訂長遠發展計劃，譬如全面清拆，安置居民上樓。好不幸，政府聾耳陳上身，一直聽而不聞。

計功夫茶話齋，呢啲咪就係鴕鳥政策囉，又可以叫做龜縮戰略，一於乜都懶理。你知啦，但凡寮屋區梗係位置偏僻嘅山旮旯地方，清拆重建冇乜肉食。其次咯喎，安置二十萬人你估容易呀？唔知又要起幾多公屋，唔知又要做幾多工夫，公務員出晒名返工淨係識得上鹹網㗎啦，你叫佢哋真係做到「民心我心」，難咯！

官僚冷漠成咁，唔使問卜占卦，功夫茶可以神機妙算話畀大家聽，寮屋火災陸續有來！