爭寵失利 耿耿於懷

「五散人」早前要煲呔曾好似對專業會議同經濟動力咁，就施政報告獨立同佢哋會面，但煲呔曾話佢哋唔係政團，連一個正式名稱都冇，請佢哋食檸檬。尋日佢哋開會討論未來路向，好多人對呢單嘢耿耿於懷，今後會要求煲呔曾同各名司局長一視同仁，多啲同佢哋五個一齊獨立會面。如果政府堅持分開見，藉此將佢哋逐個擊破，佢哋唔排除會好似上次見煲呔曾咁，集體杯葛。

對於傳媒幫佢哋起落嘅「五散人」外號，五人其實意見不大，認為某個程度都反映到佢哋嘅合作情況，但亦有人覺得呢個始終唔係正式名稱，上唔到大場面，如果有人建議一個更好聽嘅名，佢哋都會積極考慮，仲歡迎各界提供意見。

堅持「三不」 加強合作

實質運作方面，五人都話佢哋參選時，講明唔加入政黨或需要綑綁投票嘅政治聯盟，經過一年運作，佢哋亦好享受呢種自由身生活，會繼續保留不組黨、不綑綁投票、以及不設召集人或發言人制度嘅「三不政策」。不過五人睇到喺立法會內單打獨鬥，有時好蝕底；幫佢哋各自嘅業界爭取權益，亦弊多於利。所以嚟緊一年佢哋會針對個別有共同興趣、或者對業界利益攸關嘅議題加強合作，盡量達成一致投票立場，必要時會學泛民同傳統左派咁玩「冧友」，透過五把聲音同五粒投票按鈕，聲援個別「散友」。

定位方面，五人認為雖然佢哋代表嘅界別以中產為主，但好多選民甚至本人都生於基層，所以決定做個「有良心的中產」，除咗關注金融、經濟、教育同醫療等傳統中產議題，亦會關心就業同福利等基層議題，並計劃聘請獨立學術機構進行調查、研究，頭炮就係中產同基層都相當關注嘅最低工資立法。