汪阿姐素顏Look搭飛機

港區政協上京，卓妮當然要去送班老友機啦，雖然要晨咁早起身，不過一眾女委員照舊執到正，兼帶齊裝備。方黃吉雯着件綠色上衣配黑色中褸西褲；阿姐汪明荃以格仔造型示人，拖住個LV旅行篋，瀟瀟灑灑素顏上機；朱蓮芬帶備四套St.John閃爍盛裝，每日換一套；嫻姐陳婉嫻就帶定防曬霜、牛仔褲同平底鞋，準備喺閱兵儀式上陣。

恒生女大班梁高美懿有份上京。（記者陳雪玲北京傳真）	方黃吉雯黑襯綠非常搶眼。 （楊歡成攝）	林大輝帶定手提電腦去做嘢，好勤力！（徐家浩攝）

女為悅己者容，但一眾男士都唔豆泥，差唔多全以老西出發，陳永棋同發叔劉皇發仲Hand carry多件上機，盧文端帶定冷衫，見佢攞住個護膚品紙袋，原來佢太太幫佢執埋防曬油，至於都帶定大褸嘅何志平，就有老婆胡慧中送機，好幸福！林大輝就有電腦陪實，方便佢一得閒就可以做嘢，分秒必爭。

右起：方文雄、胡定旭、霍震霆和林健鋒尋晚齊齊出席聯合晚宴。	盧文端帶埋防曬油上京。 （徐家浩攝）	阿姐素顏Look上京仍然好精神，個LV旅行篋仲好搶眼。

港區政協尋晚即刻有活動，政協辦公廳、中央統戰部、僑辦、港澳辦同台辦，五個單位聯合設宴款待，即係統戰系統嘅大聚會，出席人士逾四千人，協成行第三代方文雄唔係人大、政協，一樣係座上客，同醫管局主席胡定旭相當好傾，恒生銀行女「大班」梁高美懿都係座上客。

港府觀禮團多父子兵

繼港區政協浩蕩出發，特區政府觀禮團同港區人大今日亦分別動身起程，港府尋晚公布觀禮團名單，睇嚟煲呔曾嘅號召力有限，事關今年觀禮團大孖沙唔多見，但就造就唔少政經界名人父子兵團，好似嘉華國際嘅呂志和同呂耀東父子、合和胡應湘同胡文新、「新界王」劉皇發同劉業強、福建幫施子清同施榮忻；甚至有一家三口上陣，好似「領呔大王」曾憲梓同囝囝智雄、智明，霍英東家族嘅震霆、震寰同第三代嘅啟剛。行政、立法機關中，三十四名建制派議員同三司十二局，基本係空群出動嘅格局。

不過，以上並非港人上京總名單，事關統戰部、國安部等不同部門都各有邀請名單，據聞本港有超級富豪臨時唔得閒而沒應邀上京，新鴻基地產副主席郭炳江夫婦就應宋慶齡基金會邀請出席連串十‧一活動。