呢嗱，就咁，曾蔭權大概半年前好有型咁講過，香港要發展六大優勢產業，又醫療中心，又教育樞紐，又呢樣，又嗰樣。過咗咁耐嘞，似乎乜都冇，如果十月發表施政報告仍然攞唔出具體辦法，相信佢將會得到一個新花名：吹水權。

咦，咪住，暫時唔講施政報告，先睇一個調查報告。

民協做過民意調查，探討市民對施政報告嘅期望，結果顯示七成二受訪者根本唔知道何謂六大產業，更加冇人噏得出全部產業嘅內容。比較高知名度嘅係醫療、教育以及環保產業，之但係，認知率都只不過係百分之八咁大把。

咁就弊傢伙嘞，曾蔭權出盡飲奶力做推銷員，市民居然唔知佢乜嘢葫蘆賣乜嘢藥。更加尷尬嘅係，民意調查又顯示，超過五成受訪者對特區政府落實六大產業冇信心，擔心會好似以前「中藥港」、「數碼港」或者乜乜中心物物港咁樣虎頭蛇尾。

點解六大產業認知率低得咁交關嘅呢？根據民協嘅解讀，原因係政府以精英主義嘅思維施政，同市民嘅距離好遙遠。呢個講法比較學術性，功夫茶有一個更加直接到肉嘅解讀：喂，你乜鬼都冇做，人哋鬼知你乜產乜業乜東東咩！如果醫療失誤唔係多成咁，醫療產業連百分之八嘅認知率都冇呀！

話時話，問心嗰句，曾蔭權係咪誠心誠意相信醫療係優勢產業㗎？抑或佢講嘅其實係「憂世產業」？前日之嘛，一日之內居然發生幾宗離奇個案，醫院幫孕婦接生，點不知，接一個跛一個，接兩個跛一雙。幾個小寶寶一出世，唔係斷手，就係斷腳。假如係自然分娩，你都可以解釋話係生產過程有阻滯，導致斷手斷腳啫，家陣人哋係剖腹產子喎，對於熟手技工嚟講易過借火啦，肚皮劏一刀，ＢＢ攞出嚟，簡直就係探囊取物，因乜解究醫院接生會接到倒瀉籮蟹㗎？

至於其他醫療事故咯喎，幾乎可以犯嘅錯都犯過，打錯針啦，輸錯血啦，割錯胸啦。最近有一宗仲神奇，有孕婦去聯合醫院生ＢＢ，唔知點解要打麻醉針，人哋一覺瞓醒，阿仔變咗弱智，子宮神秘失蹤。根據醫院嘅講法，由於失血太多，所以有必要切除子宮。切除子宮絕子絕孫咁大件事，有冇得到當事人同意㗎？醫院又話嘞，當事人簽咗同意書㗎喇，不過成份文件唔見咗之嘛。

唉，香港本來號稱有四大經濟支柱，若然結合六大優勢產業，加加埋埋就係十碌大柱，如果做得好好睇睇，確係相當過癮㗎。可惜吖，前車可鑑，走咗一個老懵董，又嚟一個吹水權，優勢未必有，憂世一定得！