政府落實最低工資立法最具爭議之處，當然係最低工資定喺邊個水平啦，負責制訂首個最低工資水平嘅臨時最低工資委員會不敢怠慢，唔理勞工顧問委員會討論最低工資時已經外訪過其他國家睇過實際情況，委員會呢個禮拜六就出發去法國同英國實地考察，見吓相關法定諮詢組織、商會同工會參考吓情況。
話就話今次行程去九日，但扣除搭飛機嘅時間，實際每個地方只係去三日，除咗主席鄭若樺外，其餘十二位商界、學術界、勞工界同政府成員個個都係大忙人，只係得第二站英國行程最齊人。首站法國可能有四分一成員去唔到，包括新鴻基地產副主席郭炳江，為咗早前環球貿易廣場單六死工業意外已搞到頭都大埋，但仍百忙之中抽空去第二站英國行程，可見郭炳江為保障工人點都出一分力。
而負責最低工資條例草案嘅政府代表，勞工及福利局常任秘書長鄧國威亦只係去英國站，據聞政府一直傾向參考英國做法，唔通常秘因為呢個原因，覺得法國嘅最低工資制度唔值得參考？