為免再次贏波輸口實，立會足球隊計劃喺新一年度球季檢討外援制度，盡量搵番多啲議員出賽。睇嚟立法會嘅長勝紀錄好快就會終止㗎喇！

立會足球隊上屆受到隊員嚴重老化同慣性放飛機所累，要湊夠最低要求嘅六名議員出賽，已經極之困難，更何況係贏波？去年立法會改選後，兩名愛波議員譚偉豪同林大輝雙雙進身議會，立即運用佢哋喺外面搞開專業足球隊嘅經驗，對立會足球隊進行大改革，並身體力行落場踢埋一份，最終成功搞活番成隊波，令議員嘅出賽率從谷底回升，並曾經歷史性咁出現十一名議員同時落場嘅盛況。

議員行行企企半場冇氣

除咗議員嘅出賽率回升，立會足球隊亦喺過去一年開出五戰五勝嘅無敵戰績，包括二比○贏消防處、一比○小勝駐港領事、三比○大數廣東社團總會、二比一險勝特區政府高官、以及一比○輕取記者隊等，五場計落入九球失一球，帳面勁過唔少甲組班霸。

不過如果大家有真正落場睇過佢哋踢波，就會發覺班議員喺場上都係行行企企居多，跑唔夠半場就冇氣換人，真正踢得嘅大多係領隊I.T.豪同隊長林大輝喺外面請返嚟嘅外援，令對手輸咗都唔得心服口服，質疑佢哋靠外援贏波。

I.T.豪亦好老實咁同我哋講，為咗提高議員嘅入波機會，其實佢喺排陣時已經盡量安排班議員踢中前場，龍門同後衞則以外援為主，但最後九個入球當中，仍然只有一球係由林大輝攻入，其餘八球都係由外援後上入波，即係成隊波不論攻守都係主要靠班外援，情況好唔理想，需要自我檢討。佢又話會嘗試約班議員隊友進行地獄式集訓，苦練死球戰術同底線傳中，大家夾熟啲先再正式上場搏殺，希望佢哋唔好又故態復萌集體放飛機喇！