我哋前晚喺醫學界聯歡晚宴，撞見久未露面嘅何兆煒，何醫生去年尾辭去東華執行總監一職後，抖咗一陣又接到高薪聘書，擔任郭位嘅軍師，何醫生話，啱啱幫城大遞咗一份申辦獸醫學院嘅計劃書畀大學撥款委員會，申請與世界排名首位嘅美國康奈爾大學合辦全港首個獸醫學士課程。

查實郭校長年初已表露心迹話想搞獸醫學院，集中研究公共衞生及食品安全，點知畀教資會冷待，今次搵何醫生加盟，擺明係想增加彈藥，話晒何醫生打過沙士硬仗，搞公共衞生簡直係身經百戰，不過佢唔係讀獸醫出身，將來就算有獸醫學院都唔會做院長喎。何醫生亦擔任中大公共衞生學榮譽教授，閒來教吓書，自由度大好多喎。

郭位做海豚訓練員

至於海洋公園之行，郭位爭住做海豚訓練員，搶晒鏡，佢先摸咗海豚幾下，接住畀指令叫海豚轉圈、擺尾，海豚竟然聽晒佢話乖乖照做，氹到郭位忘晒形，開心地轉埋一份。郭校長對城大未來發展充滿信心，話連串慶祝活動陸續有來，包括城大夜宴、演奏會、學術講座等，節目多到媲美台慶騷。