每逢立法會休假抖暑，都會有大批議員離港外遊充電。大家咪以為淨係出身工商界同專業界嘅富貴議員先會識享受，形象草根嘅工聯會葉偉明同職工盟李卓人，早前亦分別同家人去咗歐洲同美國玩，仲一去就去足十幾日，近日先至返香港重投工會及議會工作。
現年四十四歲嘅葉偉明，原來早兩年先同愛人拉埋天窗，當時佢仲喺工會打緊工，搞結婚都要慳住使，最後只係近近哋去咗南韓度蜜月。依家佢「升呢」做咗立法會議員，早前就同太太去咗英國、法國同意大利豪玩兩個星期補數。佢話早年去過歐洲公幹，但時間好短，冇乜機會周圍玩，佢太太更加從未踏足過歐洲，所以今次玩得好開心。
李卓人同太太鄧燕娥今次去美國，主要係陪囡囡Justina入讀當地嘅大學。Justina係去年會考嘅九Ａ狀元，今年啱啱讀完中六，已經有三間本地大學爭住收佢，亦有唔少外國大學肯畀獎學金佢去當地留學，不過佢最後都揀咗冇獎學金嘅紐約大學讀新聞系。阿人話佢兩公婆都好支持囡囡嘅決定，最多自己以後去少幾次旅行，慳番啲錢畀Justina做學費同生活費喎。