受到金融海嘯同豬流感雙重打擊，普通打工仔冇被減薪裁員已經值得偷笑，何況係大幅加薪一倍？偏偏政府最近建議大幅調高刑事法援律師費七成至一倍，律師會轄下嘅刑法及訴訟程序委員會依然認為係過低，決定集體杯葛接辦刑事法援案件一個月。

話仲少過水喉匠

我哋日前喺一個酒會撞到王會長，佢好勞氣咁同記者講，好多市民睇到政府大幅調高刑事法援律師費，就以為佢哋貪得無厭㩒住搶，但如果睇番實質金額，區域法院案件由依家嘅每粒鐘三百蚊增加超過一倍，都係得六百二十蚊，佢早幾日屋企爆水喉，求其call個水喉匠上嚟修理，都話要收六百蚊一粒鐘喇！冇理由啲律師讀咁多書學咁多嘢，收費都唔及一名水喉匠喎。

我哋喺另一個場合再撞到兩名前律師會會長黃嘉純同周永健，亦都異口同聲力撐今次杯葛行動。黃嘉純強調佢哋早喺九二年已向政府提出有關問題，傾咗成十幾年到依家先有回應，將今次建議加幅扣番咁多年嚟嘅通脹率，其實即係冇加過。

周永健話自己都接辦過唔少法援案件，雖然佢係專做民事案，收費高過刑事少少，但仍然同佢喺私人市場收開個價差好遠，扣埋啲燈油火蠟同機會成本，其實同做義工冇乜分別，令好多資深律師敬而遠之喎。

不過亦有人指出，依家私人市場嘅刑事案律師收費，一向都低於民事案，政府嘅收費建議只係反映咗市場嘅實際情況。再者經過今次調整後，政府嘅外判刑事法援開支，將會由過往嘅九千萬元倍增至一億九千萬元。正所謂羊毛出在羊身上，呢啲都係納稅人嘅錢，政府自然要慳住嚟使。究竟今次係政府太守財出手太低，定係啲律師獅子開大口？市民真係要自己判斷喇！